İçəri Şəhər - Bakı şəhərinin mərkəzində sahəsi 22 ha. olan qədim şəhərdir. "İçəri Şəhər"də müxtəlif dövrləri əhatə edən 50-dən çox tarixi və memarlıq abidələri vardır. Bu günə qədər qorunub saxlanmış abidələrə Şirvanşahlar sarayını, Qız qalasını, Sınıq qalanı misal göstərmək olar.
Bakı özünün tarixi-memarlıq abidələri və müdafiə istehkamları (qalaları) ilə Azərbaycan şəhərləri arasında mühüm yer tutur.
Şirvanşah III Mənüçöhrün XII əsrin birinci yarısında Bakı şəhərinin qala divarlarını çəkdirməsi, bu gün İçəri Şəhərin tarixi memarlıq qoruğuna çevrilməsində böyük rol oynayıb. İndi bizim əsas vəzifəmiz İçəri Şəhərin əvvəlki görkəmini qorunub-saxlanılmasına çalışmaq olmalıdır. İçəri Şəhərin ərazisi 12 tərəfdən qala divarları ilə əhatə olunub. "Bayıl qalası", "Qoşa-Qala qapıları", "Cənub Qapısı" və s.
Qız qalası - qədim qala, Bakı şəhərində yerləşən abidələrdəndir. İçəri şəhərin sahilə yaxın hissəsində yerləşir. Hündürlüyü 30 m., divarlarının qalınlığı 5 m-dir. Qız qalası XII əsrdə Məsud Davud oğlu tərəfindən inşa olunmuşdur.
Son dəfə Qız qalası 1960-cı illərdə restavrasiya olunmuşdur. 1964-cü ildə muzey kimi fəaliyyət göstərməyə başlamışdır. 2000-ci ildə YUNESKO-nun abidələri siyahısına salınmışdır.
http://www.icherisheher.gov.az/